港大終極慳錢頹食攻略2014

歷代頹食之最 - 舊莊月明canteen (已結業)

歷代頹食之最 – 舊莊月明canteen (已結業)

唔理你係新生入學,定係就grad老鬼,面對大學多姿多采嘅生活,總或有手緊嘅時候,又或者你本身就好似小弟咁係一個極度窮苦學生,咁嘅情況下,與其信咩貸款廣告或傳銷種金,倒不如慳慳地頹食返幾餐,等補完習後又係一條好漢。

一直以來好多人批評港大冇啖好食,落水街或更遠嘅西寶城已經慢慢變成一種習慣,double cohort迫爆campus之後大家就更名正言順四出覓食。對本身就冇乜味覺嘅小弟嚟講,你話出去食係唔係真係正好多我唔評論,但若你講出去附近食有幾平幾抵,就真係同特區警察呢幾年啲遊行數字冇乜分別,冇嘅,呢期農曆七月你咪搵鬼信囉。

港大啲野可能真係唔好食,裝修之前嘅莊月明canteen十仔酸齋飯更可能真係大專學界嘅劣食一哥,但論抵食,只要你識搵,喺港大食一定可以抵到冇朋友 (意思係長期咁食嘅話你肯定會冇朋友)。小弟不才,綜合多年來滯留港大各飯堂嘅經驗,由早餐、晏晝、下午茶到晚飯嚴選campus內最抵食法,務求令你餐餐廿零蚊以內有嘢食有嘢飲。做定心理準備,由於係頹食,所以啲咩Grove、Subway、一粥麵,甚至係新莊月明嘅偽pepper lunch都唔會有得食,如果睇到呢句你已經覺得接受唔到,請你click上一頁返去買你嘅七折Starbucks。

 

 

早餐

地點:SU can
食品:餐蛋麵
價錢:$13.5 連熱飲

港大啲大canteen嘅好玩之處,在於往往有隱藏食品比你發掘,由舊莊月明嘅車仔飯,到潛伏SU can好多年嘅餐蛋麵,通通都係抵食之選。叫得餐蛋麵,可以轉做腿蛋通是常識吧,查實收銀機前面有張粉紅色紙,左上角有晒成個list比你配搭,自選兩樣餸搭通粉、米粉或福麵。唔要兩樣餸可以要炸菜肉絲添 (好似係),但感覺上冇咁抵,雖然點都會抵過你食餐牌上嗰啲咩南瓜粟米粥搭炒麵。

同屬大家樂集團嘅Swire can理論上都有同樣嘅野,但小弟最近未有機會親身查證。

 

午餐

地點:SU can / Swire can
食品:單餸飯
價錢:約$18連熱飲

晏晝如果你搵到位嘅話,如果你搵到位嘅話,如果你搵到位嘅話 (很重要所以要說三遍),其實SU同Swire can仲有另一隱藏食品,就係明明只寫雙餸但你可以叫單餸嘅飯。單餸平過雙餸不在話下,兜餸仲要大兜啲,即係話如果你同friend去食,comm掂食同樣嘅餸嘅話,買兩個單餸飯share,啲餸總量一定多過你買兩個雙餸。當然,如果有朋友會肯同你做埋呢啲頹到冇朋友嘅嘗試,你都係時候要重新估計下佢嘅為人。

 

下午茶

地點:SU can
食品:餐蛋麵
價錢:$14.5 連熱飲

你冇睇錯,為增加頹廢度,係同早餐同一樣嘅野,仲要唔知點解貴咗一蚊,呢個問題我諗就算你問收銀嗰班阿姐都答你唔到點解。雖然係貴左一蚊,但比起嗰啲咩冰極魚柳或雞翼搭半件西多都仲要平一截。

另外下午茶應該仲有一樣隱藏食品叫西多,係就咁全份西多,又係餐牌上冇,幾年前叫過,唔怕熱氣嘅話歡迎自行向收銀阿姐查證而家仲有冇。

 

晚飯

地點:一念素食
食品:日日唔同
價錢:自助形式,價錢段重量計,最低消費$20

由於一日三餐都幫襯大家樂集團好似有啲令人難以接受,所以晚飯轉個地點。呢間一念素食喺港大都好出名,應該唔駛小弟多介紹,玩法亦大部份人都知,每100克餸十五蚊,最低消費廿蚊。晏晝晚飯同價,但前面已經介紹過,晏晝有更抵食嘅選擇。

100克有幾少野我諗去食過嘅人都知,200克三十蚊份量嘅餸其實都只係啱啱好夠攝牙罅。

但小弟放得喺到推介,大家都應該有心理準備知咩事同點解,冇錯,想頹想平嘅原則就係貪佢飯同湯任食,盡量比最低消費廿零蚊將自己撐飽到宵夜都唔駛食。未必個個知道嘅係如果你啲餸嘅份量未夠最低消費,收銀會叫你返去夾多啲,所以慳錢嘅原則就係寧願太少餸後加都好過一次過夾得太多,而且煲湯個底到其實有湯渣可以當餸。好似喺屋企阿媽阿婆成日同你講咁,飲多碗湯,裝多碗飯,廿零蚊飽到抱住個肚走冇難度。

 

舊莊月明熱水機

舊莊月明熱水機

時代變遷,昔日相較舊莊月明已經算係好食同稍貴嘅SU can如今已經變成頹食首選,裝修完變晒質嘅新莊月明已經冇乜真正稱得上平嘅嘢。但呢兩年先入學嘅人唔會明,當你幾年來晚晚喺連年初一都開嘅莊月明入面,一邊食住碟十仔,一邊見住啲阿姐用粉紅色托盤墊地嚟拖垃圾膠袋、直接開熱水機倒水落地拖水桶,係有一種親切感喺度。呢種感覺,就好似黃克競樓條紅梯咁,見證一個時代。

然後此情不再。

Advertisements

About quenthai

終於不再是大學生,男,自稱女性主義者,但腦袋充斥極右思想

Posted on 21/08/2014, in 其他. Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: